Uyan Tatar, uyan keday!
Uyan Tatar, uyan keday,
Eskí defter hesap karay,
Inanma ğat hesabîna,
Ózíñ bólíp, ózíñ topla!
Uyan Tatar, borjîñ óde!
Atañ eğel tóşegínde
Aytîp brakkan edí saga,
Kol at endí, dúniyaga!
Uyan Tatar, íşní beğer!
Kómílmegen ğenazeler
Kabírstanîñ kapîsînda
Beklep buktî, mewta-mewta.
Uyan Tatar, kalma ğatay,
Tur ayakka, Kîrîm-Nogay,
Altay tílíñ-medeniyet,
Şatlak awazlarnî ğok et!
Uyan Tatar, sesíñ kóter, Ğîydîñ bogazîña, yeter! Seníñ hakkîñ bo memleket Ke Baysîñ sen, Tokîz Millet. (Kóstenğe, 12 mayîs 2010)
Kîrîm kaynayKaradeñíz şala mújde, Ğatma endí, kuwan sen de, Şîk mezardan, kór kartbabay! Kîrîm kaynay, Kîrîm kaynay… Kayttî kalkîm memleketke Ses uyumî hoşka kete Uyan Tatar, tur Dokîzbay! Kîrîm kaynay, Kîrîm kaynay… Bír mús kele esken ğelden Erkin sesler de deñízden Dúniyalar şaşîp karay Kîrîm kaynay, Kîrîm kaynay… Felek toldî ğúregíme Enver dewlet kîsmetíme Ónder Tatar tílím yaşay Úyken-Kíşke-Kîrîm kaynay… (Kóstenğe, 14 oşak 2010)
Bolsa eger
Bolsa eger atîñ Tatar Batîrsîñ sen, ğúregíñ bar Bílegíñe şoñgîr konar Omîzîña da melekler Atîñ Tatar bolsa eger.
Bolsa eger atîñ Tatar Kózíñ temír, kolîñ iğbar Nazarîñdan kurşun kaytar Ólím saga tiymiy geşer Atîñ Tatar bolsa eger.
Bolsa eger atîñ Tatar Baskan taşîñ yerden oynar Sîkkan taşîñ suwî şîgar Karşî tursun saga kímler Atîñ Tatar bolsa eger?
Bolsa eger atîñ Tatar Altîn sózíñ şuwa atar Fikirleríñ awur tartar Seníñ gibílerí ender Atîñ Tatar bolsa eger.
Bolsa eger atîñ Tatar Mayday hakkîñ ústke şîgar Óz tílíñdedír anaktar Mañlayîñda yazar zafer Atîñ Tatar bolsa eger.
Bolsa eger atîñ Tatar Ğaralarîñ şifa tabar Tañrî saga kîsmet saklar Kókyúzúnde de Ulka-Yer Atîñ Tatar bolsa eger.
Bolsa eger atîñ Tatar Emelíñní gúller basar Túşúñ şeşek-şeşek aşar Yuwalanîrlar búlbúller Atîñ Tatar bolsa eger. (Kóstenğe, 16 temmuz 2010) 
|
Ne
Ne
tuwup nurlarga aşar edím kóz
Ne şúrúp toprakta bolîr edím toz.
Ne
ósíp baladan şîgar edím er
Ne ğemaát íşínde tabar edím ğer.
Ne
ilham, ne nefes, ne solîş, ne es
Ne awuz fikirge, ne eda, ne ses.
Ne dogan
uşurtup ğîgar edím kuş
Ne kírpík ğumganda yaşar edím túş.
Ne ğuyruk kamîşlap boylar edím kîr
Ne kagîp penğíre ğîrlar edím ğîr.
Ne tuygî, ne sewda, ne bízler, ne óz
Ne şiir-manzúme, ne lugat, ne sóz.
Ne keríp ğayîmnî sogar edím aw
Ne keskín baltam man kerter edím taw.
Ne zúlfiy şáşímde oynar edí ğel
Ne maga arkadaş baylar edí bel.
Ne kuwat, ne kudret, ne ateş, ne kúl
Ne dostlîk, letafet, ne şeşek, ne gúl.
Ne
şumnî atlatîp kórer edím tañ
Ne bardan kaberlí kurar edím
añ.
Ne ğónden sapmadan ğúrer edím túz
Ne ílím, felsefe, añlar edím
uz.
Ne bílím, ne irfan, ne zaman, ne an
Ne edep, din-iman, ne namus,
ne dan.
Ne
ólí ataga ğayar edím kol
Ne tírí balaga aşar edím ğol.
Ne
karap pazardan alîr edím ğan
Ne etím-tamîrîm suwlar edí
kan.
Ne
zihin, ne zekáa, ne akîl, ne oy
Ne kîsîm-akraba, ne tuwgan, ne soy.
Ne
bír boş şanakka mení karattîñ
Ne akîl bermeden masal añlattîñ.
Ne korktîñ túşmege ateşke-suwga
Ne hergún ğem yettí balalî
kazga.
Ne raátlík, ne yukî, ne kúlúw, ne haz
Ne sefañ boldî kóp, ne kaygîñ da az.
Kábege
arkamda taşîsam gene
Men saga
ódemem borjîmnî, nene!
(10 aralîk 2010)
Başqalarğa oqumağa oñaytlı bolsun dep bizde Qırımda qullanılğan urufatqa çevirdim. RiverRat
Ne
Ne tuvıp nurlarğa açar edim köz Ne çürüp topraqta bolur edim töz. Ne ösip baladan çıqar edim er Ne cemaat içinde tabar edim cer. Ne ilham, ne nefes, ne soluş, ne es Ne avuz fikirge, ne eda, ne ses.
Ne toğan uçurtıp cıgar edim quş Ne kirpik cumğanda yasar edim tüş. Ne cüyrük qamçılap boylar edim qır Ne qağıp pencere cırlar edim cır. Ne duyğu, ne sevda, ne bizler, ne öz Ne şiir-menzüme, ne luğat, ne söz.
Ne kerip ğayımnı soğar edim av Ne keskin baltamman kerter edim tav. Ne zülfiy çaçımda oynar edi cel Ne mağa arqadaş baylar edi bel. Ne quvet, ne qudret, ne ateş, ne kül Ne dostluq, letafet, ne çeçek, ne gül.
Ne şumnı atlatıp körer edim tañ Ne bardan qaberli qurar edim añ. Ne cönden sapmadan cürer edim tüz Ne ilim, felsefe, añlar edim üz. Ne bilim, ne irfan, ne zaman, ne an Ne edep, din-iman, ne namus, ne dan.
Ne ölü atağa cayar edim qol Ne tiri balağa açar edim col. Ne qarap bazardan alır edim can Ne etim-tamırım suvlar edi qan. Ne zein, ne zekâ, ne aqıl, ne oy Ne qısım-aqraba, ne tuvğan, ne soy.
Ne bir boş çanaqqa meni qarattıñ Ne aqıl bermeden masal añlattıñ. Ne qorqtıñ tüşmege ateşke-suvğa Ne er kün cem yetti balalı qazğa. Ne raatlıq, ne yuqu, ne külüv, ne haz Ne sefañ boldı köp, ne qayğıñ da az.
Kâbege arqamda taşısam kene Men sağa ödemem borcımnı, nene!
Sílíñíz kózíñízní Kók yúzí aşîlayatîr Selamlañîz kúneşní Kara kúnler ketiyatîr. Aşîñîz maktaw Kókke Tílegíñíz şîgayatîr Kaybîmîzdan kaberní Elametlí beriyatîr. Óbíñíz şógíp ğerní Ğer kîbîrdap toktayatîr Bataklîktan kalkîmîz Şabalanîp şîgayatîr. Ílíñíz şít terekke Teregímíz oñayatîr Tîşawlangan îrgîmîz Saglam tamîr atayatîr. Alîñîz dawul tozîn Hawa kulak salayatîr Dawul sesí sagînîp Ğel de esíp toktayatîr. Oynañîz tebe-tebe Omîrga túzeliyatîr Ewlatlarîmîz endí Kambîr sílkíp atayatîr. Şalîñîz ğalpak-ğalpak Kantarmamîz kobayatîr Buwulgan bogazîmîz Ses-dawuş şîgarayatîr. Şîgîñîz taya-toña Awur hawa okîyatîr Kanundur eskí ádet Uyugan kan kîzayatîr. Gezíñíz úyden-úyge Ayak emín basayatîr Şatañlamadan endí Topallar kîdîrayatîr. Kúlúñúz şarpîldatîp Kolîmîz şeşíliyatîr Şolaklîk kúnlerímíz Artta kalîp pítiyatîr. Karañîz ewlatlarga Tílí şîgîp tuwayatîr Ğeñgí koşîk ezberlep Karîndan kóz aşayatîr. Ğayîñîz ana tílín Tíl súyegí íríyatîr Kurup kalgan erínler Suwlanîp kîbîrdayatîr. Míníñíz tóbelerge Ana ğónler bekliyatîr Sîrt, kún betí, kúnbatar Kol sallap şakîrayatîr. Karañîz uzaklarga Mezarlar ğîbîrdayatîr Atalar súyeklerí Tak-tok etíp kaytayatîr. Ázírleníñíz ğolga Ulusumuz turayatîr Topragîna kuwulgan Atlantîlar awayatîr. (Kókten sesler, I- ínğí bólím, Temúçinden - kîta)
|
Ádet túşúmPaul Verlaine
Kele bere ótken, kuğurday túşúme,
Bír eğnebiy katun, şegermíz bíz sewda,
Mení ğandan súye, mení añlay-ala,
Tabiyatî sabit, deñíşmiy túrlene.
Ke o mení añlar, mením íşím, saydam
Onîñ úşún tek, ay! heş bolmay mesele
Onîñ úşún sáde, mañlayîmnî bíle
Ğîlap suwutmaga ateşlensem-kîzsam.
Esmer, sarî, kîzîl? Şáşín rengín bílmem
Lákin atî ela, tatlî, ğîmşak, mahrem,
Eskí dostlar atî, kayîplarga sîrdaş.
Ekí kózí algan hewkellerden nazar,
Sesí mesafelí, taşîr hilmiy, ğuwaş,
Ólílerden kalgan, aziz awaz-ğîrlar.
(Taner Murat'îñ kaytarmasînda, 2011)
Arthur Rimbaud
- Kalgan edí bek şîpalak,
Keñ terekler merak, kurnaz,
Atîp terezege yaprak,
Kelír edí yakîn, az-az.
Mol koltîkta tutup mesken
Yarî-ğalañ, kol tutuşa,
Ğerde úrkeler hewesten
Wak ayaklar, ğuka-ğuka.
- Bír kóz atsam, mum rengínde
Kíşke bír nur, oynak, zerlek
Dalgalana tebessúmde,
Kókírekte – gúlde bóğek.
- Inğe topîk man bílekler
Óptím, kúldí ğîmşak, azgîn,
Kesíp ğîltîr zengúleler
Gúzel billúr kúlúşlerín.
Ufak ayak kaşîp kete
Kólek astî: "Pítír endí!"
- Razî bolîp elk ğúretke
Igí kúlúş ğeza berdí.
Erínímde kaltîragan
Sábiy kózín óbíp aldîm.
- Başîn yawaş artka tartkan:
"Endí fazla bo yapkanîñ!"
"Bay, músaade, ekí lafka…"
- Artkan óbúw kókírekke
Atîlganda, kúlúp ala,
Kúlúş ibraz heweslíkke.
- Kalgan edí bek şîpalak,
Keñ terekler merak, kurnaz,
Atîp terezege yaprak,
Kelír edí yakîn, az-az.
(Taner Murat'îñ kaytarmasînda, 2011)
Sewdalîlar ólímí
Charles Baudelaire
Ğataklarîmîz ğeñgíl mús kokîr
Mezarday deren tutarmîz divan
Hoş sema astî tek bízge aşkan
Kuğurlî şeşek keştemíz taşîr.
Soñ sîğaklarîn ozîşîp alîr
Ğúreklerímíz, engin meşale
Ruhlarîmîzga, egíz piyale
Koşak ziyalar kuyulup kalîr.
Mawî-pembelí akşam sîrînda
Tek şagîmlaşîp óz aramîzda
Dermíz elveda tartîp kókírek.
Lekelí ayna, ólí ateşler
Aralap kapî soñra tazeler
Kúlúmsúregen sofî bír melek.
(Taner Murat'îñ kaytarmasînda,
18 mart 2011)
|
